ਅਮਰੀਕਾ ਦੇ ਸਾਬਕਾ ਰਾਸ਼ਟਰਪਤੀ ਡੋਨਾਲਡ ਟਰੰਪ ਦੀ ਧੀ ਟਿਫਨੀ ਟਰੰਪ ਨੇ ਐਤਵਾਰ ਨੂੰ ਆਪਣੇ ਲੰਬੇ ਸਮੇਂ ਦੇ ਬੁਆਏਫ੍ਰੈਂਡ ਮਾਈਕਲ ਬੋਲੋਸ ਨਾਲ ਵਿਆਹ ਕਰਵਾ ਲਿਆ। ਪੇਜ ਸਿਕਸ ਮੁਤਾਬਕ ਇਹ ਵਿਆਹ ਟਰੰਪ ਦੇ ਫਲੋਰੀਡਾ ਸਥਿਤ ਰਿਹਾਇਸ਼ ਮਾਰ-ਏ-ਲਾਗੋ ਵਿਖੇ ਹੋਇਆ।
ਟਰੰਪ ਨੇ ਨਿਭਾਈਆਂ ਵਿਆਹ ਦੀਆਂ ਰਸਮਾਂ
ਮੰਡਪ ਨੂੰ ਨੀਲੇ, ਗੁਲਾਬੀ ਅਤੇ ਚਿੱਟੇ ਫੁੱਲਾਂ ਨਾਲ ਸਜਾਇਆ ਗਿਆ ਸੀ ਜਿੱਥੇ ਟਿਫਨੀ ਨੇ ਮਾਈਕਲ ਨਾਲ ਵਿਆਹ ਦੀਆਂ ਰਸਮਾਂ ਕੀਤੀਆਂ। ਤੁਹਾਨੂੰ ਦੱਸ ਦੇਈਏ ਕਿ ਟਿਫਨੀ ਨੇ ਐਲੀ ਸਾਬ ਦੁਆਰਾ ਡਿਜ਼ਾਈਨ ਕੀਤਾ ਲੰਮੀ ਸਲੀਵ ਪਰਲ ਵੈਡਿੰਗ ਗਾਊਨ ਪਾਇਆ ਹੋਇਆ ਸੀ, ਜਿਸ ਵਿੱਚ ਉਹ ਬੇਹੱਦ ਖੂਬਸੂਰਤ ਲੱਗ ਰਹੀ ਸੀ। ਸਾਹਮਣੇ ਆਈਆਂ ਤਸਵੀਰਾਂ ‘ਚ ਟਰੰਪ ਆਪਣੀ ਧੀ ਨੂੰ ਲਾੜੇ ਕੋਲ ਲਿਜਾਣ ਦੀ ਰਸਮ ਨਿਭਾਉਂਦੇ ਨਜ਼ਰ ਆ ਰਹੇ ਹਨ। ਵਿਆਹ ‘ਚ ਮੇਲਾਨੀਆ, ਇਵਾਂਕਾ, ਐਰਿਕ ਅਤੇ ਡੋਨਾਲਡ ਟਰੰਪ ਜੂਨੀਅਰ ਵੀ ਮੌਜੂਦ ਸਨ।
ਵਿਆਹ ਵਿੱਚ 500 ਮਹਿਮਾਨ ਸ਼ਾਮਲ ਹੋਣ ਵਾਲੇ ਸਨ
ਸੂਤਰਾਂ ਮੁਤਾਬਕ ਵਿਆਹ ‘ਚ 500 ਮਹਿਮਾਨ ਸ਼ਾਮਲ ਹੋਣ ਜਾ ਰਹੇ ਸਨ। ਟਿਫਨੀ ਦਾ ਸ਼ਾਨਦਾਰ ਵਿਆਹ ਹੋਣਾ ਸੀ ਪਰ ਤੂਫਾਨ ਕਾਰਨ ਇਹ ਸੰਭਵ ਨਹੀਂ ਹੋ ਸਕਿਆ। ਦੱਸ ਦੇਈਏ ਕਿ ਟਿਫਨੀ ਦੇ ਮੰਗੇਤਰ ਮਾਈਕਲ ਬੋਲੋਸ ਇੱਕ ਬਹੁਤ ਹੀ ਅਮੀਰ ਪਰਿਵਾਰ ਨਾਲ ਸਬੰਧ ਰੱਖਦੇ ਹਨ ਅਤੇ ਦੋਵੇਂ ਚਾਹੁੰਦੇ ਸਨ ਕਿ ਇਸ ਵਿਆਹ ਵਿੱਚ ਦੁਨੀਆ ਭਰ ਤੋਂ ਉਨ੍ਹਾਂ ਦੇ ਦੋਸਤ ਸ਼ਾਮਲ ਹੋਣ।