ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਨੇ ਆਪਣਾ ਅਕਸ ਅਜਿਹਾ ਬਣਾਇਆ ਹੈ ਕਿ ਉਨ੍ਹਾਂ ਨੂੰ ਦੇਸ਼-ਦੁਨੀਆ ਦੇ ਬੱਚੇ, ਬਜ਼ੁਰਗ ਤੇ ਹਰ ਵਰਗ ਦੇ ਲੋਕ ਜਾਣਦੇ ਹਨ। ਇਸ ਦਾ ਕਾਰਨ ਇਹ ਹੈ ਕਿ ਉਹ ਪ੍ਰੀਕਸ਼ਾ ਪੇ ਚਰਚਾ, ਮਨ ਕੀ ਬਾਤ, ਸਫਾਈ ਤੇ ਹੋਰ ਪ੍ਰੋਗਰਾਮਾਂ ‘ਤੇ ਚਰਚਾ ਰਾਹੀਂ ਸਾਰਿਆਂ ਨਾਲ ਕੁਨੈਕਟ ਹੁੰਦੇ ਹਨ। ਪਰ ਕੀ ਤੁਸੀਂ ਜਾਣਦੇ ਹੋ ਕਿ ਜਦੋਂ ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਚੰਡੀਗੜ੍ਹ ਆਏ ਸਨ ਤਾਂ ਉਨ੍ਹਾਂ ਨੂੰ ਕਿਸੇ ਨੇ ਪਛਾਣਿਆ ਵੀ ਨਹੀਂ ਸੀ। ਉਹ ਦਰਸ਼ਕ ਗੈਲਰੀ ਦੀ ਇਕ ਸਾਈਡ ‘ਚ ਬੈਠੇ ਹੋਏ ਸਨ। ਪ੍ਰੋਗਰਾਮ ਖਤਮ ਹੋਣ ਤੋਂ ਬਾਅਦ ਚਲੇ ਗਏ, ਕਿਸੇ ਨੂੰ ਪਤਾ ਵੀ ਨਹੀਂ ਲੱਗਾ ਸੀ।
ਤੁਸੀਂ ਸੋਚ ਰਹੇ ਹੋਵੋਗੇ ਕਿ ਅਜਿਹਾ ਕਿਵੇਂ ਹੋ ਸਕਦਾ ਹੈ, ਇਹ ਹੋ ਹੀ ਨਹੀਂ ਸਕਦਾ, ਪਰ ਅਜਿਹਾ ਹੋਇਆ ਸੀ। ਇੱਥੇ ਗੱਲ ਅਪ੍ਰੈਲ 2000 ‘ਚ ਚੰਡੀਗੜ੍ਹ ਸੈਕਟਰ-36 ਦੇ ਐਮਸੀਐਮ ਡੀਏਵੀ ਕਾਲਜ ਦੇ ਕਨਵੋਕੇਸ਼ਨ ਸਮਾਗਮ ਦੀ ਕਰ ਰਹੇ ਹਾਂ। ਇੱਥੇ ਵਿਦਿਆਰਥੀਆਂ ਨੂੰ ਡਿਗਰੀਆਂ ਦੇਣ ਲਈ ਇਕ ਪ੍ਰੋਗਰਾਮ ਕਰਵਾਇਆ ਗਿਆ ਸੀ ਪਰ ਇਸ ਪ੍ਰੋਗਰਾਮ ‘ਚ ਮੁੱਖ ਮਹਿਮਾਨ ਮੋਦੀ ਨਹੀਂ ਸਗੋਂ ਤਤਕਾਲੀ ਗ੍ਰਹਿ ਮੰਤਰੀ ਲਾਲ ਕ੍ਰਿਸ਼ਨ ਅਡਵਾਨੀ ਸਨ। ਇਸੇ ਪ੍ਰੋਗਰਾਮ ‘ਚ ਪ੍ਰਧਾਨ ਮੰਤਰੀ ਮੋਦੀ ਵੀ ਭਾਜਪਾ ਦੇ ਹੋਰ ਲੀਡਰਾਂ ਨਾਲ ਪਹੁੰਚੇ ਪਰ ਉਦੋਂ ਕਿਸੇ ਦਾ ਧਿਆਨ ਮੋਦੀ ਉਨ੍ਹਾਂ ਵੱਲ ਨਹੀਂ ਗਿਆ। ਕਿਸੇ ਨੇ ਕਲਪਨਾ ਵੀ ਨਹੀਂ ਕੀਤੀ ਸੀ ਕਿ ਦਰਸ਼ਕ ਗੈਲਰੀ ‘ਚ ਬੈਠਾ ਵਿਅਕਤੀ ਦੁਨੀਆ ਦੇ ਸਭ ਤੋਂ ਸ਼ਕਤੀਸ਼ਾਲੀ ਵਿਅਕਤੀਆਂ ‘ਚੋਂ ਇੱਕ ਹੋਵੇਗਾ ਤੇ ਦੇਸ਼ ਦਾ ਪ੍ਰਧਾਨ ਮੰਤਰੀ ਬਣੇਗਾ। ਅਸੀਂ ਤੁਹਾਨੂੰ ਇਹ ਇਸ ਲਈ ਦੱਸ ਰਹੇ ਹਾਂ ਕਿਉਂਕਿ ਪ੍ਰਧਾਨ ਮੰਤਰੀ ਮੋਦੀ ਦਾ ਜਨਮ ਦਿਨ ਸ਼ਹਿਰ ‘ਚ ਸੇਵਾ ਪੰਦਰਵਾੜੇ ਵਜੋਂ ਮਨਾਇਆ ਜਾ ਰਿਹਾ ਹੈ। ਮੋਦੀ ਦਾ ਜਨਮ ਦਿਨ 17 ਸਤੰਬਰ ਨੂੰ ਹੈ।
ਟਰਾਈਸਿਟੀ ‘ਚ ਸਕੂਟਰ ‘ਤੇ ਘੁੰਮਦੇ ਸੀ ਮੋਦੀ
ਪ੍ਰਧਾਨ ਮੰਤਰੀ ਨਰਿੰਦਰ ਮੋਦੀ ਦਾ ਚੰਡੀਗੜ੍ਹ ਨਾਲ ਖਾਸ ਰਿਸ਼ਤਾ ਹੈ। 90ਵਿਆਂ ‘ਚ ਪੰਜਾਬ, ਹਰਿਆਣਾ ਤੇ ਚੰਡੀਗੜ੍ਹ ਦੇ ਭਾਜਪਾ ਇੰਚਾਰਜ ਰਹੇ ਮੋਦੀ ਪੰਚਕੂਲਾ ਦੇ ਸੈਕਟਰ-7 ਸਥਿਤ ਮਕਾਨ ਨੰਬਰ-481 ‘ਚ ਰਹਿ ਚੁੱਕੇ ਹਨ। ਇਹ ਮਕਾਨ ਭਾਜਪਾ ਆਗੂ ਮਹਾਵੀਰ ਪ੍ਰਸਾਦ ਦੇ ਨਾਂ ‘ਤੇ ਸੀ। ਮਹਾਵੀਰ ਹੁਣ ਇਸ ਦੁਨੀਆ ‘ਚ ਨਹੀਂ ਹਨ। ਉਨ੍ਹਾਂ ਦੇ ਛੋਟੇ ਭਰਾ ਰਾਜਕਿਸ਼ੋਰ ਇੱਥੇ ਹੀ ਰਹਿੰਦੇ ਹਨ। ਭਾਜਪਾ ਨੇਤਾ ਰਾਜਕਿਸ਼ੋਰ ਦਾ ਕਹਿਣਾ ਹੈ ਕਿ ਪ੍ਰਧਾਨ ਮੰਤਰੀ ਮੋਦੀ ਜਿਸ ਕਮਰੇ ‘ਚ ਰਹਿੰਦੇ ਸਨ, ਉਸ ਵਿਚ ਇਕ ਵਾਰ ਚੋਰੀ ਵੀ ਹੋ ਗਈ ਸੀ। ਮੋਦੀ 1994 ਤੋਂ 1999 ਤਕ ਇਸ ਘਰ ‘ਚ ਰਹੇ। ਇਸ ਦੌਰਾਨ ਉਹ ਚੰਡੀਗੜ੍ਹ ਵਿੱਚ ਤਿੰਨੋਂ ਰਾਜ ਅਤੇ ਯੂਟੀ ਪਾਰਟੀ ਦੇ ਅਹੁਦੇਦਾਰਾਂ ਨਾਲ ਮੀਟਿੰਗਾਂ ਕਰਦੇ ਰਹੇ। ਉਹ ਪੰਚਕੂਲਾ ਤੋਂ ਚੰਡੀਗੜ੍ਹ ਅਤੇ ਮੋਹਾਲੀ ਤੱਕ ਸਕੂਟਰ ‘ਤੇ ਜਾਂਦਾ ਸੀ ਅਤੇ ਟ੍ਰਾਈਸਿਟੀ ਦੇ ਕਈ ਲੋਕਾਂ ਨਾਲ ਨਿੱਜੀ ਤੌਰ ‘ਤੇ ਜੁੜਿਆ ਹੋਇਆ ਸੀ। ਇੰਚਾਰਜ ਹੁੰਦਿਆਂ ਚੰਡੀਗੜ੍ਹ ਦੇ ਨਾਲ-ਨਾਲ ਪੰਜਾਬ ਅਤੇ ਹਰਿਆਣਾ ਦੀ ਰਾਜਨੀਤੀ ਵਿਚ ਵੀ ਉਨ੍ਹਾਂ ਦੀ ਅਹਿਮ ਭੂਮਿਕਾ ਰਹੀ।
ਚੋਣ ਪ੍ਰਚਾਰ ਲਈ ਚੰਡੀਗੜ੍ਹ ਆਉਂਦੇ ਰਹੇ ਹਨ ਮੋਦੀ
ਲੋਕ ਸਭਾ ਚੋਣਾਂ ‘ਚ ਚੰਡੀਗੜ੍ਹ ਦੀ ਸੀਟ ਜਿੱਤਣ ਲਈ ਸਾਲ 2014 ਅਤੇ 2019 ‘ਚ ਖ਼ੁਦ ਇੱਥੇ ਪ੍ਰਚਾਰ ਕਰਨ ਮੋਦੀ ਆਏ ਸਨ। ਇਹ ਮੋਦੀ ਦੀ ਅਗਵਾਈ ‘ਚ ਹੀ ਸੀ ਕਿ ਭਾਜਪਾ ਨੇ ਚੰਡੀਗੜ੍ਹ ਤੋਂ ਪਹਿਲੀ ਵਾਰ 1996 ਤੇ ਫਿਰ 1998 ‘ਚ ਲੋਕ ਸਭਾ ਚੋਣਾਂ ਜਿੱਤੀਆਂ। ਦੋਵੇਂ ਵਾਰ ਭਾਜਪਾ ਉਮੀਦਵਾਰ ਸਤਯਪਾਲ ਜੈਨ ਜੇਤੂ ਰਹੇ। ਜਦੋਂ ਮੋਦੀ ਚੰਡੀਗੜ੍ਹ ਦੇ ਇੰਚਾਰਜ ਸਨ ਤਾਂ ਚੰਡੀਗੜ੍ਹ ਵਿੱਚ 1996 ਦੀਆਂ ਨਿਗਮ ਚੋਣਾਂ ‘ਚ ਭਾਜਪਾ ਨੇ ਕਾਂਗਰਸ ਦਾ ਸਫਾਇਆ ਕਰ ਦਿੱਤਾ ਸੀ।