ਪੰਜਾਬ ਵਿੱਚ ਹਾਲ ਹੀ ਵਿੱਚ ਆਏ ਹੜ੍ਹਾਂ ਨੇ ਸੂਬੇ ਦੇ ਬਿਜਲੀ ਬੁਨਿਆਦੀ ਢਾਂਚੇ ਨੂੰ ਵੱਡਾ ਝਟਕਾ ਦਿੱਤਾ ਹੈ। ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ ਨੇ ਮੁੱਢਲੇ ਮੁਲਾਂਕਣ ਤੋਂ ਬਾਅਦ ਨੁਕਸਾਨ ਲਗਭਗ 102.58 ਕਰੋੜ ਰੁਪਏ ਦੱਸਿਆ ਹੈ। ਅਧਿਕਾਰੀਆਂ ਨੇ ਦੱਸਿਆ ਕਿ ਪਠਾਨਕੋਟ ਵਿੱਚ ਅੱਪਰ ਬਿਆਸ ਡਾਇਵਰਸ਼ਨ ਚੈਨਲ (ਯੂਬੀਡੀਸੀ) ਹਾਈਡਲ ਪਾਵਰ ਪ੍ਰੋਜੈਕਟ ਸਭ ਤੋਂ ਵੱਧ ਪ੍ਰਭਾਵਿਤ ਹੋਇਆ ਹੈ, ਜਿਸ ਨੂੰ 62.5 ਕਰੋੜ ਰੁਪਏ ਦਾ ਨੁਕਸਾਨ ਪਹੁੰਚਿਆ ਹੈ।
ਪੰਜਾਬ ਸਟੇਟ ਪਾਵਰ ਕਾਰਪੋਰੇਸ਼ਨ ਲਿਮਟਿਡ (ਪੀਐੱਸਪੀਸੀਐੱਲ) ਦੀ ਮੁੱਢਲੀ ਮੁਲਾਂਕਣ ਰਿਪੋਰਟ ਅਨੁਸਾਰ 2,322 ਡਿਸਟ੍ਰੀਬਿਊਸ਼ਨ ਟਰਾਂਸਫਾਰਮਰ ਖਰਾਬ ਹੋ ਗਏ, ਜਦੋਂ ਕਿ 7,114 ਬਿਜਲੀ ਦੇ ਖੰਭੇ ਰੁੜ੍ਹ ਗਏ ਜਾਂ ਨਸ਼ਟ ਹੋ ਗਏ।
ਰਿਪੋਰਟ ਵਿੱਚ ਕਿਹਾ ਗਿਆ ਹੈ ਕਿ ਲਗਪਗ 864 ਕਿਲੋਮੀਟਰ ਕੰਡਕਟਰ ਅਤੇ ਸਪਲਾਈ ਲਾਈਨਾਂ ਵੀ ਡਿੱਗ ਗਈਆਂ, ਜਿਸ ਨਾਲ ਕੁੱਲ ਨੁਕਸਾਨ ਵਿੱਚ 4.32 ਕਰੋੜ ਰੁਪਏ ਦਾ ਵਾਧਾ ਹੋਇਆ।
ਪੀਐੱਸਪੀਸੀਐੱਲ ਦੇ ਆਪਣੇ ਬੁਨਿਆਦੀ ਢਾਂਚੇ, ਜਿਸ ਵਿੱਚ ਦਫ਼ਤਰੀ ਇਮਾਰਤਾਂ, ਕੰਟਰੋਲ ਰੂਮ ਅਤੇ ਉਪਕਰਨ ਸ਼ਾਮਲ ਹਨ, ਨੂੰ 2.61 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ ਹੈ।
ਰਿਪੋਰਟ ਅਨੁਸਾਰ ਵੈਕਿਊਮ ਸਰਕਟ ਬ੍ਰੇਕਰ, ਪੈਨਲ, ਬੈਟਰੀਆਂ ਅਤੇ ਰੀਲੇਅ ਵਰਗੇ ਮਹੱਤਵਪੂਰਨ ਹਿੱਸਿਆਂ ਨੂੰ 46 ਲੱਖ ਰੁਪਏ ਦਾ ਗੰਭੀਰ ਨੁਕਸਾਨ ਪਹੁੰਚਿਆ। ਜਦੋਂ ਕਿ ਗਰਿੱਡ ਸਬਸਟੇਸ਼ਨਾਂ ਨੂੰ ਲਗਭਗ 2.55 ਕਰੋੜ ਰੁਪਏ ਦਾ ਨੁਕਸਾਨ ਹੋਇਆ।
ਪੀਐੱਸਪੀਸੀਐੱਲ ਦੇ ਇੱਕ ਸੀਨੀਅਰ ਅਧਿਕਾਰੀ ਨੇ ਕਿਹਾ, “ਹੜ੍ਹਾਂ ਕਾਰਨ ਟਰਾਂਸਫਾਰਮਰ, ਖੰਭੇ ਅਤੇ ਲਾਈਨਾਂ ਜਾਂ ਤਾਂ ਪਾਣੀ ਵਿੱਚ ਡੁੱਬ ਗਈਆਂ ਜਾਂ ਰੁੜ੍ਹ ਗਈਆਂ, ਜਿਸ ਨਾਲ ਵੱਡਾ ਨੁਕਸਾਨ ਹੋਇਆ। ਸਾਡੀਆਂ ਮੁਰੰਮਤ ਟੀਮਾਂ ਨਾਜ਼ੁਕ ਸਬਸਟੇਸ਼ਨਾਂ ਅਤੇ ਪ੍ਰਭਾਵਿਤ ਪਿੰਡਾਂ ਵਿੱਚ ਬਿਜਲੀ ਬਹਾਲ ਕਰਨ ਲਈ ਚੌਵੀ ਘੰਟੇ ਕੰਮ ਕਰ ਰਹੀਆਂ ਸਨ।”
ਨੁਕਸਾਨ ਬਾਰੇ ਅਧਿਕਾਰੀ ਨੇ ਕਿਹਾ, “ਇਹ ਸਿਰਫ਼ ਇੱਕ ਸ਼ੁਰੂਆਤੀ ਅੰਦਾਜ਼ਾ ਹੈ। ਇੱਕ ਵਾਰ ਜਦੋਂ ਹੜ੍ਹ ਦਾ ਪਾਣੀ ਘੱਟ ਜਾਂਦਾ ਹੈ ਅਤੇ ਅਸੀਂ ਜ਼ਮੀਨੀ ਪੱਧਰ ‘ਤੇ ਨਵਾਂ ਮੁਲਾਂਕਣ ਕਰਨ ਦੇ ਯੋਗ ਹੁੰਦੇ ਹਾਂ, ਤਾਂ ਅਸਲ ਨੁਕਸਾਨ ਵਧਣ ਦੀ ਸੰਭਾਵਨਾ ਹੈ।”